إنييڭو أريسطا

إنييڭو أريسطا
معلومات عامة
زيادة	ج. 771 County of Bigorre
لموت	851 ↔ 852 Isaba-Izaba
لجنسية	الإمبراطورية الكارولنجية مملكة نبرة
لحرفة	حاكم و محارب
لّوغات لي كيعرف	اللاتينية
لفاميلة
لواليد	Íñigo Jiménez
لواليدة	Onneca of Pamplona
خوت	فورتون إنييڭيس، موسى بن موسى و مطرف بن موسى
شريك	Onneca Velázquez de Pamplona
لولاد	ڭارصيا إنييڭيس د پامپلونا ڭالينضو إنييڭيس أصونا إنييڭيس نونيلونا إنييڭيس
معلومات خرى
دين	مسيحية

إنييݣو أريسطا (ب لباسكية Eneko، ب لعربية ونّقه، مزيود ف جوايه 771 تال 790، توفى ف 851 ولّا 852) زعيم قبايلي باسكي و أول ماليك ديال پامپلونا. كيتّعتاقد بلي الشان ديالو طلع بعد لهزيمة ديال لفرانكيين ف معراكة پانكوربو ف عام 816، و لحكم ديالو بدا من بعد لهزيمة ديال جيش لكارولينݣيين ف 824.

الدليل اللول على لوجود ديالو كيبان ف مرويات ب عتيبارو متمرد ضد إمارة قرطبة من 840 تال لوفاة ديالو شي 10 سنين موراها. حيت بزاف كيعقلو عليه كا مؤسس ديال مملكة ناڤار، من لقرن 10 ولّاو كيلقّبوه ب "أريسطا" لي جات من لباسكية Aritza (من Haritza/Aiza لي كاتعني "صحيح" ولّا "مقاوم") ولّا من اللاتينية Aresta (لي كاتعني "كبير" ولّا "مهمّ").

لأصل

لأصل ديال إنييݣو أريسطا مامعروفش. كاين ختيلاف حتى على السمية ديال بّاه. كاينة وتيقة ف لييري لي وصفاتو ب Enneco ... filius Simeonis (إنييݣو ولد خيمينو) و وتيقة خرة ف نفس لموضع لي كاتوتّق لݣنازة ديال "إيينيݣو ولد ݣارسيا" مكتوب فيها Enneco Garceanes, que fuit vulgariter vocas Areista (إنييݣو ولد ݣارسيا لمعروف ب أريسطا). بزاف د التوارخيا تبعو وحدة من هاد التسميات ولا لخرة، ولايني لموتوقية ديالهم محط التساؤل، بسباب لإمكانية ديال التلاف ولّا التزوير.

بن حيان لي عاش ف لقرن 11 سمّاه "بن ونّقه البسكوني"، و العذري سمّاه "بن ينقه"، يعني بجوج كيݣولو بلي بّاه كان سميتو "إنييݣو". على حساب رودريݣو خيمينيس دي رادا (ج. 1170-1247) إنييݣو أريسطا كان قنديش ديال منطقة بيݣور (دابا ف فرانسا)، ولّا على لأقل أصلو من تماك، ولايني ماكاينش شي دليل على هادشي لي قريب للفترة لي عاش فيها إنييݣو.

كاين قتيراح بلي كان كيجي ف لعائلة ل ݣارسيا خيمينيس، لي ف لقرن 8 خدا بلاصة لواليد ديالو خيمينو لقوي ف مقاومة لكارولينݣيين ف التوسع ديالهم ف ڤاسكونيا. السلالة التانية ديال لملوك د پامپلونا (من مور إنييݣو) كيتݣال بلي عندها علاقة معا داك الشخص نيت.

السمية د لواليدة د إنييݣو مامعروفاش (كاين لي كيسميها ؤنيكا Onneca بلا دليل) ولايني معروف بلي من بعد تجوجات مولّد (إيبيري أصلي لي عتانق لإسلام) سميتو موسى بن فورتون لقسوي و ولدات معاه موسى بن موسى لقسوي. هاد موسى لولد ولّي الزعيم ديال بني قسي و حاكم ديال توديلا، و واحد من الشيفان ديال وادي إبرو. ب فضل لعلاقة د الدم بين إنييݣو و موسى، كانو متحالفين ف بزاف د لفترات، و هادشي خلا إنييݣو يوسّع السلطة ديالو على مساحات كبيرة ف وديان لپيريني، و هاد لعلاقة لعبات دور محوري ف التمرد لي قادو إنييݣو و أدى ل لإستقلال ديال پامپلونا على إمارة قرطبة.

الطلوع ف السلطة

لفاميلة د إنييݣو طلعات ف النفود من الصراعات على السلطة ف شمال إيبيريا بين لفرانكيين و إمارة قرطبة. ف 799، شي قتّالا موالين للفرانكيين غتالو مطرف بن موسى، لي كان لحاكم ديال پامپلونا و غالبا كيجي ل موسى بن موسى لقسوي. بن حيان كيعاود بلي ف 816، عبد الكريم بن عبد الوحيد بن المغيث بدا حملة عسكارية ضد "عدو الله" ڤيلاصكو لݣاسكوني (ب لعربية بلشك الجلشقي)، السيد د پامپلونا (ب لعربية صاحب بنبلونة) لي كان موالي للفرانكيين، و كان جمع لمسيحيين و لوتنيين. ف نفس لعام، تحاربو 3 يام ف معراكة پانكوربو لي قدرو فيها لقوات ديال قرطبة باش يغلبو عديانهم و يقتلو ڤيلاصكو، زيادة على ݣارسيا لوپيص لي كان كيجي للماليك ألفونصو التاني د أستورياس، سانتشو لي كان معروف ب "محارب پامپلونا"، و لمحارب لوتني صالطان. لهزيمة ديال لحولافا د لفرانكيين خلات إنييݣو لي كان ضدهم باش يطلع ف السلطة.

ف 820، كيتݣال بلي إنييݣو تدخل ف مقاطعة أراݣون باش يجرّي على التابع لفرانكي، قنديش أسنار اللول ݣالينديس، ل صالح ݣارسيا ݣالينديس، لي ولّى راجل بنت إنييݣو. ف 824، لكارولينجيين، ب قيادة إيبلوس و أسنار سانتشيس، دارو حملة ضد پامپلونا، ولايني نهازمو ف لمعراكة التانية د رونسيسڤاليس.

ف شي نصوص تقليدية، كيتݣال بلي إنييݣو تتوج ماليك د پامپلونا نيشان مورا و بسباب هاد لمعراكة، ولايني ماكاين تا شي دليل مباشر على هاد لهضرة، لا من جيهة لمشاركة ديالو ف لمعراكة والا بلي تدار ليه تتويج موراها. عند التوارخيا لعرب كيتّعطى ليه نفس اللقب ديال ڤيلاصكو، يعني "السيد د پامپلونا". الدولة ديالو بقات كاتّلاعب ب لمسلمين و لمسيحيين ضد بعضياتهم باش تحافظ على لإستقلال ديالها ضد لقوات لبرّانية.

التمرد و لموت

ف 840، هجم والي سرقسطة، عبد الله بن كليب، على لأراضي ديال إنييݣو، شي لي خلا خوه موسى بن موسى باش يعلن التمرد. ݣارسيا، ولد إنييݣو، ولّا شاد السلطة ب النيابة، و معا عمّو فورتون إنييݣيس (ب لعربية فرتون بن ونّقه)، لي تا هوّ كان خو ماشي شقيق ديال موسى، جمعو لقوات ديالهم معا موسى بن موسى و دارو تورة ضد إمارة قرطبة. لأمير د قرطبة عبد الرحمان التاني دار حملة مضادة لي ستامرات عوام مورا هاد لأحدات.

فورتون إنييݣيز تّقتل ف واحد لمعراكة ف 843، و موسى مشى ليه عودانو و ضطر باش يهرب على رجليه، ف لوقت لي إنييݣو و ولدو ݣالينضو هربو مجروحين، و عدد ديال النوبالا، أهمهم ڤيلاصكو ولد ݣارصيا، بدّلو لفيستة ل جيهة لأمير عبد الرحمان. ف السنوات لي موراها ݣالينضو ولد إنييݣو، و لب ولد موسى بن موسى، تا هوما حوّلو لولاء ديالهم ل قرطبة، و موسى ضطر باش يستسلم. من مور واحد لحملة محدودة ف 845، رجع السلام ف جميع لمناطق. ف عام 850، عاود ناض موسى ف تمرد مدعوم من عند پامپلونا، و إندوو (غالبا مقصود هنا إنييݣو) و ميتيو، صيفطو مرسولين ل لقصر د فرانسا.

ف 237 هـ (لي كاتوافق اللخر د 851 ولّا لبدية د 852)، توفى إنييݣو، و شد ولدو السلطة من موراه، لي كان أصلا ديجا حاكم ب النيابة بسباب لمرض ديال بّاه.

لييري، دير مهم ف ناڤار

ف فترة إنييݣو، كانو بزاف د الديار ف ناڤار، على حساب لفرايلي لقرطبي إيولوݣيوس لي كان سكن ف لمنطقة ف 848. ف بريّة كتبها للأسقف ديال پامپلونا، ويليسينضو، إيولوݣيوس كيݣول بلي الزعيم لباسكي كان "أمير مسيحي" و عطا السميات ديال 3 د الديار مابعادش على پامپلونا: سيريسا، سانطا زاكارياس و لييري.

الدير د لييري لمتميّز تأسس ف لقرن 9، و كيتݣال بلي أسسو لماليك د پامپلونا لي عطاه أراضي باش يتّبنى. واحد لوتيقة ف الدير كاتبيّن بلي ف 842، إنييݣو دار عطيّة، منها لقرية و لأراضي د ييسا باش يتبنى دير لييري، و هاد لوتيقة كاتبدى ب Ego rex Eneco concedo (أنا لماليك إيينيݣو كانعطي...) ولايني الصحة ديال هاد لوتيقة كاين عليها جدل. كيتݣال بلي إنييݣو براسو تّدفن ف الدير ف 851/852.

السلالة و لعلاقات د لعائلة

السمية ديال لمرا (ولّا لعيالات) ديال إنييݣو مامدكوراش ف لوتايق لي كيرجعو ل نفس لفترة، ولايني مصادر معطلة ب قرون كاتسميها طودا ولّا ؤنيكا. كاين نقاش بين لأكاديميين تا على لأصل ديالها، و منهم لي فتارض بلي هيّ بنت ڤاليصكو لݣاصكوني، السيد د پامپلونا لي مات ف 816، و وحدين خرين ݣالو بلي كاتجي ل أسنار اللول ݣالينديس. إنييݣو كانو عندو هاد لولاد:

• أصونا إنييݣيس لي تجوجات خوه لماشي شقيق، موسى بن موسى لقسوي، السيد ديال توليدا و هويسكا.
• ݣارصيا إنييݣيز، لي كان حاكم ب النيابة و من بعد "ماليك" د پامپلونا.
• ݣالينضو إنييݣيس، لي هرب ل قرطبة و كان عشير ديال إيولوݣيوس لقرطبي. موسى بن ݣاليند، أمير د هويسكا ف 860، لي تّغتال ف 870، كان ولدو على ما كيبان.
• بنت (يمكن سميتها نونيلونا) لي تجوجات لقنديش ݣارصيا لخايب García el Malo حاكم أراݣون.

لموروت التاريخي

السلالة لي أسسها إنييݣو حكمات ل مدة 80 عام، و خدات بلاصتها سلالة منافسة ف عام 905. ولايني بسباب الجواج معا لأحفاد د إنييݣو، لملوك د ناڤار كينحادرو منو، و كاينين ݣاع روايات لي كيݣولو ب لغالاط بلي كينحادو من إنييݣو نيشان من السلالة الدكورية. إنييݣو بقى مدكور ف التاريخ ب عتيبارو لمؤسس ديال الدولة د ناڤار.

مراجع

• Barrau-Dihigo, Lucien (1900). "Les origines du royaume de Navarre d'apres une théorie récente". Revue Hispanique (ب الفرنسية). 7 (21–22): 141–222. ISSN 9965-0355.
• Caro Baroja, Julio (1978). Sondeos históricos (ب الإسبانية). San Sebastián: Txertoa. ISBN 9788471480385.
• Collins, Roger (1990). The Basques (2nd ed.). Oxford, UK: Basil Blackwell. ISBN 0631175652.
• García Gómez, Emilio; Lévi-Provençal, Évariste (1954). "Textos inéditos del Muqtabis de Ibn Hayyan sobre los orígines del Reino de Pamplona". Al-Andalus (ب الإسبانية). 19 (2): 295–316. ISSN 0304-4335.
• Granja, Fernando de la (1967). "La Marca Superior en la obra de Al-'Udri" (PDF). Estudios de Edad Media de la Corona de Aragón. 8: 447–545. OCLC 694519776. Archived from the original (PDF) on 2016-03-04. Retrieved 2025-02-23.
• Lacarra de Miguel, José María (1945). "Textos navarros del Códice de Roda" (PDF). Estudios de Edad Media de la Corona de Aragón. 1: 193–284. OCLC 694519776. Archived from the original (PDF) on 2016-03-03. Retrieved 2025-02-23.
• Lévi-Provençal, Évariste (1953). "Du nouveau sur le royaume de Pampelune au IXe siècle". Bulletin Hispanique (ب الفرنسية). 55 (1). Université de Bordeaux: 5–22. doi:10.3406/hispa.1953.3340. ISSN 0007-4640.
• Martínez Díez, Gonzalo (2007). Sancho III el Mayor Rey de Pamplona, Rex Ibericus (ب الإسبانية). Madrid: Marcial Pons Historia. ISBN 978-84-96467-47-7.
• Pérez de Urbel, Justo (1954). "Lo viejo y lo nuevo sobre el origin del Reino de Pamplona". Al-Andalus (ب الإسبانية). 19 (1): 1–42. ISSN 0304-4335.
• Sánchez Albornoz, Claudio (1958). "La epístola de S. Eulogio y el Muqtabis de Ibn Hayan" (PDF). Príncipe de Viana (ب الإسبانية). 19 (72–73): 265–266. ISSN 0032-8472.
• Sánchez Albornoz, Claudio (1959). "Problemas de la historia Navarra del siglo IX" (PDF). Príncipe de Viana (ب الإسبانية) (20): 5–62. ISSN 0032-8472.
• Settipani, Christian (2004). La Noblesse du Midi Carolingien (ب الفرنسية). Oxford: Unit for Prosopographical Research. ISBN 9781900934046.
• Stasser, Thierry (1999). "Consanguinity et Alliances Dynastiques en Espagne au Haut Moyen Age: La Politique Matrimoniale de la Reinne Tota de Navarre". Hidalguía: La revista de Genealogía, Nobleza y Armas (ب الفرنسية). Madrid: Instituto Salazar y Castro: 811–839. ISSN 0018-1285.