إتحاد لبلقان
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
فـ أواخر القرن 19 وحتا القرن 20، كانت كتطرح بزاف فكرة ديال إنشاء إتحاد بلقاني من عند تيارات سياسية مختالفة فـ منطقة البلقان، خصوصاً من عند اليساريين. هاد الفكرة كانت كتهدف باش يتأسس إتحاد فدرالي جديد كيجمع دول البلقان، على أساس ديال الإشتراكية، التضامن الإجتماعي، المساواة الإقتصادية، و التعاون بين الشعوب. وخا الشعوب ديال هاد المنطقة عندهم إختلافات فـ الأصل و الدين و الثقافة، كانت الفكرة كتشوف بلي الحاجة المشتركة للتحرر و العدالة تقدر تكون أساس وحدة قوية فـ المنطقة.[1]
هاد الفكرة السياسية دازت من ثلاث مراحل فالتطور ديالها. المرحلة اللولة جات ف بدية د القرن 20، و كانت رد فعل على السقوط ديال الدولة العثمانية، و ف هاد الوقت بدات تتشكل الفكرة ديال إتحاد بين دول البلقان. فـ المرحلة الثانية، اللي كانت ما بين لحروب لعالمية (من 1919 حتى لـ1936)، خداو الشُعلة الأحزاب الشيوعية ديال البلقان، و ولاو هما اللي كيدافعو على فكرة الإتحاد. أما المرحلة الثالثة، فا تميزات بالصراع بين زعماء الشيوعيين ديال البلقان و جوزيف سطالين، اللي كان ضد الفكرة ف الفترة اللي جات من بعد الحرب العالمية الثانية.
أول مرة جات فيها فكرة الإتحاد البلقاني كانت فـ بيلڭراد فـ سنة 1865، ملي بعض المفكرين من البلقان دارو جمعية سميتها الفيدرالية الديمقراطية الشرقية، و كانو كيقتارحو إتحاد كيمتد من جبال الألپ حتى ل قبرص، مبني على الحرية السياسية و المساواة الإجتماعية. هاد المفكرين كانو مؤمنين ب مبادئ الثورة لفرانساوية، و ب الأفكار الفيدرالية ديال سان سيمون، و مرتابطين ب الأفكار الإشتراكية ديال كارل ماركس و ميخائيل باكونين.
من بعد، فـ فرانسا فـ سنة 1894، تأسسات جمعية سميتها عصبة الإتحاد البلقاني، اللي شاركو فيها إشتراكيين من اليونان، بلغاريا، صربيا، و رومانيا، و كانو كيدعمو فكرة الإستقلال الذاتي ديال مقدونيا داخل إتحاد عام فـ أوروپا الجنوبية، كمحاولة ل حل المشاكل المعقدة ديال "قضية مقدونيا".
المحاولة الموالية كانت مباشرة من بعد ثورة تركيا الفتية فـ 1908، و فـ العام اللي من بعد (1909) فـ مدينة سالونيكا، تْدمجات جمعية العمال الإشتراكيين مع جوج مجموعات إشتراكية بلغارية، و تأسسات منظمة سميتها الفيدرالية الإشتراكية ديال عمال الدولة العثمانية. هاد المجموعة ما كانتش كتعتابر القومية مسألة مهمة حتى لـ 1913، و ما كانتش كتشوف بلي حق تقرير المصير مهم بزاف. و وخا داكشي، القيادة ديالهم كانت كتحافظ على موقف معتدل تجاه النزعات القومية اللي كانت كتكبر وسط الأحزاب الإشتراكية فـ البلقان.
حركة الإتحاد الإشتراكي ديال البلقان بانت من بعد ثورة الشباب الأتراك فـ1908. أول مؤتمر إشتراكي للبلقان تدار بين 7 و 9 يناير 1910 ف بيلڭراد. المواضيع الرئيسية ف هاد المؤتمر كانت وحدة البلقان و التحرك ضد الحروب اللي كانت قريبة تجي. نقطة مهمة أخرى كانت الدعوة لحل "المسألة المقدونية". فـ1915، من بعد مؤتمر ف بوخاريست، تقرر إنشاء إتحاد عمالي إشتراكي ثوري للبلقان، كيضم مجموعات اللي كانت متبعة مؤتمر تسيمرڤالد Zimmerwald conference و كتعارض المشاركة ف الحرب العالمية اللولة. ف البدية كان على راس هاد الإتحاد كريستيان راكوڤسكي، و كان من بين النشطاء المهمين ڤاسيل كولاروڤ و جورجي ديميتروڤ. فـ1915، كتب ديميتروڤ بلي مقدونيا، "… اللي كانت مقسمة لثلاثة د لأجزاء …"، غادي تكون "… موحدة ف دولة وحدة كتتمتع بحقوق متساوية ف إطار الإتحاد الديموقراطي ديال البلقان". هاد مقدونيا المستاقلة و الموحدة كانت غادي تشمل المناطق الجغرافية اللي كانت تابعة ل پولونيا و يوݣوسلاڤيا و اليونان. القادا ديال الإتحاد تعاقبو من عند حكومات البلقان ف مراحل مختلفة. راكوڤسكي تْطرّد من بزاف ديال دول البلقان، و خلال الحرب العالمية اللولة، ولى عضو مؤسس ف الإتحاد العمالي الإشتراكي الثوري ديال البلقان. من بعد مشى ل روسيا، و لتاحق ب الحزب البولشوڤي من بعد ثورة أكتوبر فـ1917، و من بعد ديميتروڤ و كولاروڤ و راكوڤسكي ولاو أعضاء فـالكومينترن (الشيوعية الدولية).
- ^ Georgi Dimitrov (1972). "The Significance of the Second Balkan Conference". تطّالع عليه ب تاريخ 2025-06-03.