أقا

أقا
‫أقا‬ (ar) ⴰⵇⵇⴰ (tzm)
لبلاصة
لبلاد	لمغريب
لإقليم	إقليم طاطا
السكان
شحال دالسكان	6,519 (1994)
شحال دلفاميلات	1,337 (2024)
لجغرافيا
لعلو	670 م
خط الطول بـ °	-8.25661182
خط لعرض بـ °	29.39159818
معلومات خرين
الرمز لجغرافي	2558667
لخريطة

الجامع د أقا

أقا

نخيل أقا

واحات أقا

مطفية أقا

عين مونتين ف أقا، لمغريب.

أقا مدينة مغريبية كاينة ف لإقليم د طاطا، جهة سوس ماسة، ساكنين فيها 6.519 نسمة، على حسب الإحصاء العام 2014.

أقا تقدر تكون هيّا نيت ڤاكا فين كانو ليهود ستاقرو ف لمغريب ل لمرة لّولة، مورما تدمر لهيكل ف لقدس ف لقرن سّات قبل لميلاد، علا حساب بعض لمكتوبات لقديمة.

ف تّقسيم لإداري

أقا كاتّعتابر جماعة ترابية حضرية.

إحصائيات

• نسبة الأمية: 24,8%.
• نسبة سكان لي قاريين فوق ليسي (ليسي و جامعة): 17,7%.
• نسبة الناس النشيطين (اللي يقدرو يخدمو): 37,4%.
• نسبة البطالة: 27,3%.
• نسبة الناس لي خدامين في دولة (أولا لبيطاليين لي سبق ليهوم خدمو): 41,5%.
• نسبة ناس لي خدامين ف لپريڤي (أولا لبيطاليين لي سبق ليهوم خدمو): 30,7%.

جغرافيا

واحة أقا كاينة ف جنوب لمغريب، بين لأطلس صّغير وصحرا لكبرى، وب ضبط فواحد لفم (ممر جبلي) ديال جبل باني. لواحة كتبعد بحوالي 40 كلم على واد درعة، لّي غالباً كيكون ناشف فهاد لمنطقة، وكتبعد حتى بـ42 كلم على لحدود لجزايرية. كتزود ب لما من واد أگا، لّي نادراً ما كيبان فيه لجريان فوق لأرض، ولكن لما ديالو كيتجمع من تحت لأرض وكيتوزع من ساگيات على جنان أو لواحات.

لمواصلات

أقا مربوطة بطريق معبدة (RN17) لي كتوصلها ل مدينة طاطا ف شّمال شرقي، وكاين طريق آخرى كتمشي لمدون بحال إشت، بويزگارن، گلميم وتيزنيت ف جيهة لغربية، وزيد عليها طريق ثانوي نحو إميتيك ف شمال.

لمناخ

لمناخ ديال لمنطقة جاف، وكمية تساقطات لمطرية قليلة بزّاف، ما كتفوتش 100 ملم ف سنة.

سمية

كلمة "أقا" ف لأمازيغية عندها أكثر من معنى، ممكن تعني حبة تمر أو لعنب أو زّيتون، وكتعني حتى غرق لمكان، بحال غرق لواد ولا لكهف.

تقافة

أگدير أوزرو: كيتعتبر أگادير أوزرو؛ واحد من دواور لأكتر كتافة سكانية (حوالي 3700 نسمة). تأسيس ديالو كيرجع لسيدي عبد الله بن حمد بن مبارك، لمعروف بلقب "لعرج"، ف نص ديال لقرن لعاشر لهجري، ملي خرج من قصبة لأب ديالو، وستقر مع لأتباع ديالو فهاد لمكان، باش يتفرغ لعبادة ودّراسة دّينية.

موقع أقا

لموقع ديال أگادير أوزرو استراتيجي ومهم، حيث جا فوق جرف ديال صخر كيطل على واحة أقا، وماشي غير عندو دور ديني، ولكن كان حتى مخزن جماعي. فداخل أگادير أوزرو، كاينة مراقبة دقيقة لواحد لبير كيبان من سور، وزيد عليها ساعة ديال لما مزدوجة لّي كتبين لأهمية ديال تقسيم لما بطريقة متعادلة. وف سنين لأخيرة، تعاود لاعتبار لهاد لموقع تّاريخي بعد عمليات ترميم، وتنظيم تكوينات لسكان باش يحافظو عليه.

متحف شيخ عمر

متحف شّيخ عمر؛ هو واحد لمتحف تبنى سنة 2001 ف مدينة أقا على يد براهيم نوحي، لّي كان من أعضاء لمقاومة وجيش تحرير ف لمغريب. كيتوفر لمتحف على مجموعة مهمة من لوثائق تاريخية لّي كتهم مراحل مختلفة من تاريخ لمغريب عموما، وتاريخ لمنطقة خصوصا، وفيه حوالي 600 وثيقة. كاينة حتى سيارة قديمة ديال براهيم نوحي كترجع لسنة 1956 من نوع "ويلي"، وزيد عليها هيليكوبتير قديمة فرنسية صنع، لي كتعطي فكرة لزوار على لهجمات لجوية لّي كان كيديرها لاستعمار لفرنسي ضد لمغاربة، ولّي كانو لمقاومين كيتصداو ليها صامدين. ومن بعد، خدات سلطات لمحلية كل سلاح ولقرطاس لّي كان معروض ف لمتحف لأسباب أمنية.

فضاء ذاكرة تاريخية لمقاومة وتحرير

هو فضاء تربوي وثقافي ف متحف تأسس سنة 2014، كيوفر لزوار أكثر من 50 قطعة ديال متحف. فيه مرافق تعليمية بحال مكتبة، قاعة لأنترنت، أو قاعة لتشغيل ذاتي وريادة لأعمال، وقاعة لتواصل. كينظم أنشطة وبرامج تعليمية وترفيهية على مدار لعام.

نقوش صخرية

موقع أم لعلق كاين على بعد 7 كلم ف لجنوب شرقي ديال أقا، وقريب من دوار أم لعلق. هاد لموقع فيه جوج مواقع رئيسية: كارة وتيونزوين، وكيتكون من ثلاث ديال جبال عامرة ب نقوش على صخر؛ لي عاملينهم بتقنية صقل لمعدني. هاد نقوش كتمثل لوحات فنية ف لهواء طلق؛ فيها صور ديال حيوانات مختلفة، وعددها كيتجاوز 40 نقش صخري. كتشكل رسوم ظباء نسبة كبيرة، ولباقي كيمثل لأبقار، لفيلة، زرافات، وحيد لقرن ولغزلان.

سياحة

كيتعتبر لمركب سياحي ديال أقا من أهم لبنيات تحتية سياحية ف لمدينة، ولكن نشاط ديالو ضعيف بزاف، وما ستفدوش منو سكان بشكل كبير، حيث كيتستعمل دابا غير بحال موقف للكرافانات ديال سياح.

لمدينة ما فيها حتى فندق لإقامة سياح، وهاد شي كيخلي زوار من بعد زيارة ديال أقا ولمناطق لّي حداها يكملو طريق لمدون لوخرى، ولا كيرجعو لمدينة طاطا لي فيها لفنادق.

سياحة فأقا كتكون غالباً على شكل جولة استكشافية، كتنطلق من وسط لمدينة، ومن بعد كيطلعو لقصبة سيدي عبد الله بن مبارك، باش يتفرجو فواحة أقا وموقع أگادير أومغار تاريخي، ومن بعد كيمشيو لشي تعاونية ديال تمور باش يتعرفو على لأنواع لمحلية. ومن بعد كتكمّل لجولة بزيارة قلعة أاگدير أوزرو وتعرف على تاريخ ديالها، وكتسالي زيارة فموقع نقوش على صخر ديال أم لعلق. وهاد لمسار كيبقى هو لأكثر اختياراً عند سياح.

رياضة

كاين فأقا فريق لكرة لقدم سميتو تامدولت. أما لبنيات تحتية رياضية فهي محدودة، وكتكون من ملعب أقا ف مدخل لمدينة، وزيد عليه لمركب سوسيو رياضي لقرب، وهو مركب صغير تدشن سنة 2018 وشاد مساحة ديال حوالي 4000 متر مربع.

تنقل ولمواصلات

طريق لوطنية رقم 12 كتشكل شارع رئيسي ف لمدينة. أو سهال تنقل، حتى دارو طرق معبدة كتربط بين مركز أقا وأم لعلق وأگادير أوزرو ولقبابة، وزيد عليهم بعض زناقي وشوارع لي تصلحات.

باش توصل لأقا بوسائل تنقل لعمومي، كاينة محطة ديال طاكسيات لكبيرة، وكدوز منها حتى طوبيسات ديال تنقل بين لمدون، وكتربط أقا بين مدون بحال طاطا،گلميم، طانطان، أگادير ودار لبيضا.

مصادر

ويكيميديا كومنز عندا تصاور و معلومات على أقا.

هادي زريعة ديال مقالة خاصها تّوسع. تقدر تشارك ف لكتبة ديالها.