أتاي مغاربي

مقالة ؤلا فقرة خاصها تّقاد. هاد لمقالة ؤلا هاد لفقرة مرونة شوية، خاصّها تّقاد ؤ تزيد تّنضّم. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!

أتاي مغاربي
معلومات عامة
نوع د لماكلة	أتاي خضر و أتاي بالنعناع
لبلاد لأصلية	لمغرب لكبير

 أتاي لمغاربي هو مشروب سخون كاتّستعمل فيه لعشبة ديال أتاي. كاينتاشر بزاف ف لبلدان لمغاربية بحال المغريب و تونس و لجزائر و موريطانيا. لحضور ديالو ضروي ف الطبلة لمغاربية، و ف القصائد و لكتوبا ديال شّوعارا ؤ لؤدابا. أتاي لمغرابي تايكون عادة بالنعناع، لكن يقدر يكون تا ب الشيبة، خصوصا ف الشتا. وهو مشهور ف ليبيا، خاصة ف لعراضات و لمناسبات و غيرها و تايسميوه ب "شاهي لعالة".

أتاي بنعناع أساسي ف لحياة لإجتماعية ف لمنطقة لمغاربية، حيت تايعطي واحد الطابع حتفالي يلا تحط للضياف. عادة كايتكلف مول ولا مولات الدار يصاوب أتاي بشكل تقليدي، و كايتحط للضياف كعلامة على حسن ضيافة. ب لعادة كايتقدمو 3 ديال لكيسان د أتاي على لأقل والاستهلاك ديالو تايكون النهار كامل. النعناع لمزيان ريحتو واضحة، و هو لي كايتستعمل ف لمصاوبة ديال أتاي لمغاربي. لكن شي مرات كايخدو تا نواع خرة ديال النعناع، و شي مرات ف لمغريب لجنب النعناع كايتعطر أتاي ب لعشوب و لورد و ما زهر ديال لّيمون. فوقت لبرد، تايزيدو لأتاي شي عشوب تايتسخنو بحال فلييو و الشيح .

تاريخ

لحبوب ديال أتاي

راجل مغربي تايوجد أتاي

دخلات بريطانيا أتاي لشمال إفريقيا فالقرن تمنطاش وتسعطاش من المغريب والجزائر. جيمس ريتشاردسون دار وصف لحفلة ديال أتاي المغرابي في الربعينات ديال القرن تسعطاش، وقال بلي فالتسافيرات ديالو كان أتاي تايتشرب بشكل كبير، النهار كامل. فالحرب ديال القرم في الخمسينات ديال القرن تسعطاش، حْولات شركة الهند الشرقية البريطانية أتاي لي مخصص لدول البلطيق للمغريب، الأمر لي خلى أتاي يولي كثير فالمغرب. مع القرن 20، رجع أتاي عادة ضرورية فالمغرب .

بدا الإنتشار ديال أتاي فالمغرب ف منتصف القرن تسعطاش، فاش نفاتحو التجار المغاربة على أوروپا، بالضبط فالوقت ديال السلطان مولاي إسماعيل، فاش توصل أبو النصر إسماعيل بلخناشي ديال سكر وأتاي فالهدايا لي جات من التجار الأروبيين للسلطان العلوي، باش يطلق سراح الحباسة الأورپيين، هذا تايدل على أن اتاي كان قليل فالدول المغرابية ديك الوقت.

الاستهلاك

موقع "أطلس العالم" قال بلي المغرب هو ثاني أكبر مستهلك ديال أتاي فالعالم، و اللول فالمنطقة المغاربية، كل مغربي تايستهلك 4,34 كيلو ديال أتاي فالعام، بعد من المغرب كاتجي موريطانيا بـ3,22 كيلو. و أتاي لخضر بالخصوص هو لي تايتستهلك بزاف فهاد المناطق.

التوجاد

المكونات الأساسية ديال أتاي المغاربي هي أتاي لأخضر والنعناع الطري، والسكر والما الطايب. و يمكن تختالف الكمية ديال المكونات والوقت ديال التوجاد بشكل كبير. تايخدمو الما الطايب فالدول المغاربية، بلاصة الما البارد لي تايخدمو فشرق آسيا باش يحيدو لمرورة. فالمنطقة المغرابيا تايخليو لوراق ديال أتاي فالبراد فاش تايشربو أتاي، لي تايخلي النكهة تختالف من كاس لكاس.

طريقة التوجاد ديال أتاي طويلة ومعقدة شوي، تانزيدو أتاي و السكر والنعناع، تقريبا 5 دلمعالق صغيرة لكل معلقة ديال أتاي. كايتشلل أتاي بشوي ديال الماء الطايب، و كايتزاد للبريق الخاص بأتاي المعروف ب "البراد" مع السكر و الماء الطايب و كايتحط على العافيا تا يطلع، و كايتزاد ليه النعناع.

• 
  ليقامة
• 
  التشلال
• 
  النعناع
• 
  السكر
• 
  واجد

أتاي بالطريقة المغربية الصحراوية

حفل الشاي الصحراوي،

أول حاجة تانسخنو الما الطايب ف"لمقراش". و فنفس الوقت تانديرو تقريبا معيلقة و نص ديال أتاي لأخضر فالبراد. فاش تايسخن الماء تانخويوه فالبراد، و تانخليوه فالعافية 8 دقايق تقريبا، من بعد تانحيدوه و تانديرو نعناع و معاه السكر باش مايتحرقوش لورقا ديال نعناع، بعدها تانقلبوه فالكيسان ديال الزاج من كاس لكاس تا كايترغوى.

أتاي لموريطاني

أتاي فموريطانيا كايوجدوه في 3 ديال الخطوات، أولا تايديرو الما يطيب فالبراد لمدة دقيقة تا ل 2 دقايق. بعدها تايزيدو أتاي لأخضر المعروف عندهم بال"بالورك" على حساب كمية الماء لي دارو، بعدها تايخليوه على العافية شوي. بعدها تايحطو أتاي معا السكر و النعناع.

الطقوس ديال أتاي

الشعوب المغاربية بدعو بزاف فابتكار طقوس خاصة بأتاي، ماكاتقتاصرش على المناسبات والأعياد، إنما جزء من الحياة اليوميا، تايوجدو أتاي النهار كامل، و فأي وقت، تا فالنصاصة دالليل، واخا عارفينو تايطير النعاس. و أتاي عند المغاربة قبل مايكون مشروب، هو وسيلة للترحيب بالضياف، حيت مايمكنش تدخل لشي دار مغربية و مايوجدوش ليك أتاي، حيت فالمغرب من قلة الصواب يزورك شي حد و ماتوجدش ليه أتاي. لي زوين في أتاي المغربي، هو الأدوات لي تايخدمو بيهم فلمصاوبة و التقديم ديالو، الصينية والبراد لبي مصنوعين من المعدن، و غالبا من الفضة، و معروف أن الصينية خاصها تكون مزوقة و منقوشة، بحالها بحال البراد لي عندو شكل زوين. مدينة فاس هي لي مشهورة بزاف بالصناعة التقليدية ديال الأدوات ديال أتاي، لي حافظو عليها لحرايفية كموروث من الأندلس، و عندها قيمة رمزية كادل على الغنى ديال مول هاد الأدوات الغالية. بحال البراد والصينية و ربايع، لي هي 3 ديال طوايس وحدة مخصصة لأتاي و وحدة لسكر، و وحدا لنعناع.

ثقافة

عام 1992 تحت الإشراف ديال ليونيسكو، تنظمات مسابقة توجاد أحسن أتاي، و ختارو المغريب لتنظيم هاد المسابقة نظرا للموقع ديالو لي قريب للمناطق لي كاتستهلك أتاي بزاف، خاصة المناطق الصحراوية، هاد المسابقة ربح فيها المغربي الحاج عبد العاطي الجوهري، و كانت الجائزة هي نقشو سميتو ف أكبر وزين ف الشينوا، لي هي أكبر منتج ديال أتاي، في الوقت لي شركة مغربية ديال أتاي سمات الماركة ديالها أتاي الصويري، نسبة ليه، حيت هو من الصويرة.

ف لأدب

أتاي عندو مكانة كبيرة في الأدب المحلي نظرا لأهميتو، تانلقواه حاضر فبزاف دالأنواع ديال الأدب بحال "الأرجوزة الفائقة المستعذبة الرائقة فيما يحتاج الأتاي إليه ويتوقف شربه وإقامته عليه" هي نشيد نظموا عبد السلام الزموري تايمدح فيه أتاي، والعادات لي مرتابطة بالشريب ديالو، والفوائد ديالو، والأوقات ديالو، والأمور لي خاص نراعيوها فاش نستهلكوه. شرح هذه المنظومة الشيخ المكي البطاوري ف لكتاب ديالو "شرح الأرجوزة الفائقة المستعذبة فيما يحتاج الأتاي إليه ويتوقف شربه وإقامته عليه"، في حوالي ميتين صفحة فيها لفوائد والأشعار ونوادر والأخبار

مِثْل الأَتَاي الوَنْدَرِيزِ مَذْهَبَهْ * عَلَى صَفَا صِينِيَّةٍ مُلْتَهِبَهْ تَطَايَرَ الهَمُّ لَدَيْهِ وَ انْشَرَحْ * صَدْرُ الَّذِي يَشْرَبُهُ مِنَ الفَرَحْ

من الأغاني الشعبية التي تغنات بأتاي لأخضر، مجموعة راينا راي الجزائرية ف أغنيتهم يا زينة ديري لاتا:

يا زينة ديري لاتاي ديري لاتاي... ومن القابسة للبراد ... يا زينة رِيبِي للواد رِيبِي للواد ... وجيبي نعناع جديد

وأغنية الصينية لمجموعة ناس الغيوان:

آْه يَا الصِّينِيَّة . . . أَيَا نْدَامْتِي وْلِيعَة بْرَّادِي فِينْ غَادِي يْتْشْحَّرْ ؟ أَيَا نْدَامْتِي وُحِيرَةْ بْرَادِي جَايْبِينْ جُوجْ مْجَامْرْ مْجْمْرْ عَامَرْ بِالْفَاخْرْ وُمْجْمْرْ بِاللّْظَى الْهَاجْرْ َفَاخْرْ صَارْ رْمَادُه لْقْلْبِي الْمْحْرُوقْ بْ لْبْعَادْ . . . آشْنُه ذَنْبْ الْبْرَّادْ آهْ يَا الصِّينِيَّة . . .

شوعارا لموريتانيين تغزلوا بالشاي تا هوما، منهم الشاعر الشيخ سيدي، لي تايقول:

يُقيمُ لنا مولايُ والليلُ مقمرٌ		وأضواءُ مِصباح الزجاجة تُزْهِرُ
وقد نسَمَت ريحُ الشمال على الرُّبى		نسيما بأذيال الدجى يتعَثرُ
كؤوسًا من الشاي الشهيِّ شهيةً		يطيب بها ليل التمام فيقصُرُ

كتب الشاعر الموريتاني أبو مدين الديماني على أتاي و قال:

ألا فاسقني كاساتِ شايٍ ولا تَذَرْ		بساحَتِها مَنْ لا يُعِينُ علَى السَّمَرْ
فوقْتُ شَرابِ الشَّايِ وقْتُ مَسَرَّةٍ		زُولُ به عن قلْبِ شاربِه الكَدَرْ

  ومن بين لي كتبوا الشعر على أتاي كاين الشاعرُ الأديب محمد ولد أحمد يوره:  

أتايُنا منْه فمُّ المَرْءِ يَحْتَرِقُ		قد طابَ سُكَّرُهُ والمَاءُ والورَقُ
باتَ المُبارَكُ يَسْقِينَا علَى مَهَلٍ		واللَّهْوُ مُجْتَمِعٌ والهَّمُّ مُفْتَرَقُ
خِلْتُ الجُمَانَ عَلَى جِبَاهِ فتْيَتَنَا		كلٌّ تَحَدَّرَ منْ جَبِينُهُ العَرَقُ!

معرض الصور

• 
  أتاي بالنعناع فالمغرب
• 
  كاس ديال أتاي
• 
  صينية ديال أتاي معا الحلوة
• 
  أتاي الصحراوي
• 
  صنية و براد ديال أتاي مزخرفين
• 
  كيسان ديال أتاي من مدينة طنجة
• 
  أتاي مكشكش

شوف حتا

• أتاي عربي
• كوزينة جزائرية
• كوزينة تونسية
• كوزينة مغريبية
• كوزينة ليبية
• أتاي ليبي
• التقافة د أتاي
• أتاي خضر